政情：蕭偉強客串收銀 自嘲出錯率高過做官
離開熱廚房後，勞工及福利局前局長蕭偉強（WK）經常孖住老婆周圍去玩，之前喺遊台灣踩雙人單車笑稱做車伕，近日喺香港轉做收銀，仲自嘲出錯率高過做問責官員。
員工幫佢執手尾
WK日前喺Facebook 上載咗幾張相，當時佢着咗圍裙企喺店舖內，畀網民讚佢好有店長Feel，佢就自嘲可惜睇得唔做得，其實佢當時做緊收銀，仲話頻頻出錯，好彩其他員工醒目，即時幫佢執手尾，先可以避免損失。
可能因為佢做過局長，主要嘅工作就係Sell政策，所以有網民就笑佢：「你強項係sell嘢，唔係收錢。」亦有網民讚佢上鏡好瘦，而佢仲反問乜我唔係減肥成功咩？
其實，WK去幫手嗰間係社企便利店，員工一半以上係殘疾人士，唔單止為殘疾人士創造就業機會，出售嘅貨品會員價貼近成本價，以惠及基層，而非會員價亦低於連鎖超市同便利店。佢仲話當日政務司司長張建宗都有嚟撐場，話張建宗又一再展現佢對數字嘅超強記憶，如數家珍比較豆豉鯪魚同午餐肉嘅超市價同社企便利店價錢添！