政情：無人機唔失蹤 余壽寧冇藉口換新歡
出外旅行梗要影相留念，香港商業專業評審中心榮譽會長余壽寧（Homer）就鍾意帶無人機出遊拍攝，因為可以睇到一般人睇唔到嘅景點全貌。佢笑笑口話，見到無人機影到嘅片段，唔止自己開心，喺社交平台分享時大家都有啲話題講吓，可以解吓悶。講講吓，佢又呻自己部無人機次次都飛返嚟，搞到想換新機都冇藉口喎，真係搞笑。
Homer笑稱，依家玩緊嘅無人機已經買咗兩年，但係部機又唔壞，又冇唔見。佢次次放部機出去拍攝時都講笑，話如果跌咗就可以買隻新嘅，點知次次都飛返嚟。佢又話，一部無人機大約七、八千元，其實只要指南針唔亂，部機就識得返嚟，所以都幾抵玩。
出發前會研究有冇禁飛區
Homer依家每次去旅行都會帶無人機，不過因為不時都有無人機誤闖敏感地區嘅消息，所以佢出發前都會上網研究當地有冇禁飛區，話至今都未試過影啲唔應該影嘅嘢。