政情：蕭偉強夫婦台中搵食放閃

同行6人飲咗50杯咖啡

蕭偉強早幾日喺社交網站發貼文，話去咗台中南投縣享受山光水色，仲搵咗啲有性格嘅特色小店，感受店主不一樣嘅生活態度。係乜嘢小店？就係咖啡工作室喇。佢哋同行六人一共飲咗超過五十杯咖啡，咖啡豆由台灣本土出產，到古巴、西班牙、雲南、馬來西亞、印尼、意大利等都試過，佢仲話好平添。之但係，佢哋平均每人試成十杯，個胃頂唔頂得順呀？

滿足咗脾胃，當然要睇下風景。蕭仲旅遊達人上身，推薦台中兩處拍攝拍拖照好地方，包括埔里山崗上嘅飛行傘基地同南投縣三育基督學院，仲上載咗幾張同老婆嘅合照，真係夠晒甜蜜喇。