中環出更：被篤爆揸車撳電話 毛孟靜認衰

報料讀者話本周一下晝近四時，喺跑馬地黃泥涌道向養和醫院方向揸車途中，發現隔籬線一架深灰色嘅房車中，毛孟靜邊揸車邊撳電話。根據讀者提供片段，毛喺停車時，雙手攞住電話放喺軚盤上、戴住耳機、口似係食緊香口膠，氣定神閒咁玩電話，至開車時佢都冇放低電話，右手控制軚盤，左手繼續攞住電話。

自揭頻出入醫院 以為醫生打嚟

經查冊後，確定涉事車輛屬於毛孟靜擁有。佢接受查詢時話，唔記得幾時發生，承認自己有邊揸車邊撳電話，為此表示抱歉，但強調自己「唔係玩電話」而係有緊急事。佢透露近來多出入醫院照電腦掃描等，當時誤以為係醫生來電先至睇。

佢之後又向記者問及係咪有戴耳機就代表安全，當得悉法例規定行車時唔可以用手機時，佢再一次講對唔住，重申自己只係心急想知身體情況。至於有乜嘢唔舒服？佢就話唔方便透露。

根據香港法例，禁止司機喺車輛行駛時使用手提式流動電話，或其他同類無線電通訊設備，違例者最高可被罰款二千元。

卓妮