中環出更：為實現「偏心」理想梁瀚譽笑認任性
早前喺一個晚宴上香港表廠商會名譽會長王堅全同秘書長梁瀚譽（Richard）兩人傾得好開心，仲一輪嘴講「偏心」、「任性」，究竟咩回事？原來兩人研究緊Richard戴住嘅一隻腕錶，上面有一個立體嘅芭蕾舞者，隻錶特別之處係「偏心」，即係睇時間嘅位置係偏向一邊。Richard話呢個設計曾經奪得鐘錶設計比賽冠軍，為咗實現夢想，不計成本做出嚟，笑言成件事好「任性」喎。
Richard話，偏心設計嘅目的係令錶盤有更多留白嘅空間，可以喺設計上玩變化，今次就放置一個立體、翩翩起舞嘅芭蕾舞者。佢笑笑口話，家族做錶超過半世紀，都唔係第一次做偏心錶，不過由於要投入研發機芯，所以都花咗唔少金錢同心力。王堅全都讚佢有堅持，好抵讚。香港人好講求個人品味，Richard直情係將「香港精神」戴上身，真係冇得輸。
當晚係香港國際珠寶展嘅招待晚宴，出席嘅仲有珠寶展籌備委員會主席馬墉宜、香港珠寶玉石廠商會理事長劉偉光及榮譽會長冼雅恩等。今次展覽首次邀請日本作為展會嘅夥伴國家，所以日本業界包括珍珠出口商組織——「日本真珠輸出組合」專務理事內海芳宏都有現身，席間同身兼貿易發展局理事嘅香港工業總會主席郭振華（Jimmy）好好傾。
郭振華鑽石首飾做賀禮
Jimmy自爆每年珠寶展都係佢一年一度大買鑽石首飾嘅時間，一來好抵買，售價至少比市價平三成，二來好靚。買咁多全部送畀太太？佢笑稱唔係，係儲埋等親友有喜事時用嚟做賀禮。佢真係識得精打細算喇。
卓妮