政情：着衫變大隻 張國鈞：六舊腹肌不是夢
為咗健康着想，好多人都鍾意做運動，甚至去做Gym，鍛煉吓啲肌肉收吓身咁，但要練到有六舊腹肌嘅話，一啲都唔容易，但身兼行政會議同立法會議員嘅張國鈞又得喎。
張國鈞不嬲都有做Gym，估唔到佢已經練到有六舊腹肌。不過，大家唔使羨慕佢，事關人人都可以有六舊腹肌，皆因腹肌唔使練嘅，着上身就得喇！
網友讚佢愈嚟愈健美
話說佢日前喺社交網站Facebook上載一張相，仲留言話「六舊腹肌不是夢」。點解？因為佢着咗件芥辣黃同黑色嘅夾棉褸，咁啱凸起嗰幾格黑色好似六舊腹肌咁，於是佢有感而發嘞！佢仲話因為嗰日係出席體育會春茗，所以着番sporty啲喎。
呢個post出咗之後，有網友就讚佢愈嚟愈健美，亦有網友笑住話（腹肌）色澤有點偏差。老實講，張國鈞做咗Gym之後，確實清減唔少，若果佢再勤力啲，練出鋼條身形同有六舊腹肌，當然唔係夢喇！