中環出更：教用App打小人 陸頌雄搵唐偉康做人辦
政府正打算修訂《逃犯條例》，美國駐港總領事唐偉康早前話內地政府對香港施壓，會衝擊香港政治生態同營商環境，若修訂條例，或會影響美國和香港雙邊協議的實施。立法會議員陸頌雄就趁尋日係「驚蟄」，用唐偉康做「人辦」教大家用App打小人。
美駐港領館「唔好打錯人」
平時香港人都淨係識去鵝頸橋，搵專業「打手」幫忙打小人，未必好清楚要噏乜或點樣做。陸頌雄就教路，先打開個App同相機，影低個小人兼寫名，再跟住口訣節奏搖動同拍打手機，將小人打到面部扭曲就大功告成。咁點解用唐偉康？陸頌雄就話，皆因唐早前「亂噏」、「衰多口」先搵佢做示範，仲刻意標籤咗美國駐港總領事館，免得唐唔知被人打添！而喺美國駐港總領事館嘅Facebook就貼文「#驚蟄 千祈唔好打錯人呀！」
另外，民建聯有十幾位社區主任同區議員，尋日手持「強烈譴責美領事抹黑一國兩制」橫額，大嗌「停止干預內政，堅決打擊分裂國家行為」口號，到美國駐港總領事館抗議同遞信。觀塘區議員顏汶羽話，對於唐偉康的偏頗和不實言論甚感失望，又希望唐放下偏見，尊重港府依法取締鼓吹港獨嘅人士同組織，以符合憲法和基本法的憲制責任喎。
卓妮