中環出更：細佬代接感謝狀 李德麟：冇理由自己頒畀自己
正所謂「為善最樂」，好多熱心公益嘅城中名人，都係一代傳一代咁做善事。早前上海總會舉行晚宴，順便頒發慈善基金捐款感謝狀。其中一位捐助人係總會永遠名譽會長李和聲，即總會理事長李德麟嘅爸爸，當日李和聲冇出席，改為好少公開蒲頭嘅兒子李德楨喺哥哥李德麟手中接下感謝狀。李德麟笑笑口話爸爸身體唔舒服未能出席，冇理由佢自己頒畀自己，所以咪由細佬出面囉！
李德麟仲話總會成立四十幾年，已變身為慈善團體，舊年直接受惠人數多達兩萬多人。佢啱啱冧莊做多一屆揸弗人，笑言希望可以將總會善業發揚光大。
當晚上海幫濟濟一堂，卓妮見保良局前總理方劉小梅嘅丈夫方杰同總會副理事長高叔平（Henry）老友鬼鬼，原來兩人係中學同學，相識幾十年。最近Henry成日去歐洲買物業，今個月就去咗一趟葡萄牙，佢話○八年發生金融海嘯時，冧晒檔嘅「歐豬五國」排第一位嘅就係葡萄牙，雖然當地經濟已漸好轉，不過房地產仲係好便宜，所以佢同太太去睇吓，順便當旅行。
朱容基帶鑽石襟針好搶眼
中華出入口商會副秘書長楊靜同丈夫朱容基（Benson）都有到場，雖然男人好少戴珠寶首飾，但當日Benson喺西裝外套上戴咗一個由黃鑽、白鑽同綠寶石鑲嵌嘅鸚鵡襟針，十分搶眼。Benson笑笑口話襟針係自家設計嘅，因為佢好鍾意鸚鵡，不過就無養過。講開鸚鵡，佢話上海有位朋友有一隻鸚鵡好叻，識得揸住大閘蟹自己拆嚟食，勁得意。
卓妮