政情：楊偉雄拋售美國五物業 籌旗定表忠心？
置業「上車」係唔少香港人嘅夢想，但唔少官員上任前已手揸幾層樓，真係羨煞旁人。根據行政會議最新嘅利益申報顯示，官守議員嘅「樓王」創新及科技局局長楊偉雄喺上月底一鋪過拋售位於美國嘅五個物業。到底楊偉雄係好唔掂要趕住走貨，定想喺中美貿易戰中表忠心呢？
根據最新利益申報，楊偉雄擁有十個物業，包括南區兩個自住住宅單位，喺元朗、灣仔同葵青合共有三個商業單位，同埋五個位於美國加州洛杉磯阿罕布拉市（Alhambra）嘅公寓住宅單位，都係用作出租之用。上月廿七日，即係財政預算案公布當日，楊就更新利益申報，刪去加州五個物業。問到點解咁急賣樓？創新及科技局發言人回覆話，只係正常物業交易，冇特別。
不過，一次過賣五個單位，對於普通市民嚟講就係好唔簡單。睇番當地樓市情況，唔少外媒報道都話舊年初南加州房屋樓價升到「嘭嘭聲」創新高，但到年底銷量就持續下降，陷入近年低位，而呢批單位係由楊偉雄兩公婆同其親戚擁有，唔知係咪見勢色唔對就急住「較腳」走人呢？
其實，財政司司長陳茂波亦喺舊年八月賣出澳洲雪梨一個住宅，連車位同儲物格，至今年一月就入手內地中山市一個住宅單位自用。
五局長均持外國物業
依家仲有五位局長手持外國物業，包括公務員事務局局長羅智光分別持有劍橋同伯明翰兩個住宅；商務及經濟發展局局長邱騰華持有三個倫敦住宅；食物及衞生局局長陳肇始持有兩個倫敦物業同一個格域物業；政制及內地事務局局長聶德權就持有一個位於伊斯靈頓嘅物業；環境局局長黃錦星亦持有一個加拿大物業。
張建宗重登樓王寶座
就因為賣咗五個美國嘅單位，楊偉雄就唔再係樓王，而政務司司長張建宗喺上屆政府仲做緊局長時，已因為手揸九個物業而被冠以問責團隊嘅樓王，多年來都「長揸」唔賣嘅佢，今次順理成章重登樓王寶座嘞！
買樓對普通市民嚟講係夢，但官員買賣物業嘅一舉一動當然惹起唔少人遐想。當中美關係緊張，一位分屬財金系統嘅官員一次過賣出美國多個物業，難免令人認為係想向國家表心迹。之但係香港創科愈搞愈唔掂，點解楊偉雄咁有閒情逸致睇住個市賣樓o架呢？