政情：許誠毅英文差 畫公仔唔對嘴
一齣成功嘅動畫除咗要畫功靚同故事吸引，原來語言都好重要。著名動畫導演許誠毅尋日出席第六屆動畫支援計劃動畫作品首映暨頒獎禮時分享去外國發展嘅由來，同喺外國因英語欠佳所帶來嘅瘀事。
冀返港製粵語動畫
許誠毅憶述當年因香港欠缺學習電腦動畫嘅機會，某日佢由朋友帶來嘅宣傳單張中得知加拿大有學校開設為期三個月嘅電腦動畫課程，於是決定去加國修讀，結果一去就返唔到轉頭。喺香港接受基礎教育嘅佢，雖然英文學過好幾年，但運用機會唔多，去到以英語溝通感到艱難。
許話曾經試過為某公司嘅卡通角色製作動畫片，旁邊嘅同事睇過之後覺得唔係好啱嘴形，要佢讀幾句對白，聽完即刻就指出原因係佢嘅英語發音唔夠準確。
佢更期望返港製作粵語動畫，因為粵語既係自己嘅母語，製作粵語動畫唔會出現嘴形唔啱嘅問題。