政情：蔡素玉外遊 備現金保平安
出外旅行難免去到治安麻麻嘅地方，去過唔少國家嘅立法會前議員蔡素玉早前出席一個活動時分享佢保平安嘅方法，就係喺身上準備定少少錢，當遇上求財嘅壞人時，就可以派上用場喇！
怕劫匪嫌少跟返酒店攞
蔡素玉話，十幾年前去過南非約翰尼斯堡，當時攞住傻瓜相機行入貧民區，佢就特別袋住二、三十蚊美金，仲教路話千祈唔好剩番兩、三蚊就行去，否則唔夠吸引，被劫匪隊埋或者押到酒店攞錢就大鑊。
好多人話南美洲治安差，佢都有驚險經歷。話說有次去巴西里約熱內盧，夜晚一個人行去貧民區，行番出嚟時被一個男人跟住，搞到佢都驚驚哋，特登行去啲舖頭停一停，好彩之後冇嘢咋！話時話，點解佢咁鍾意去行貧民區嘅？
蔡仲話，身上準備定少少錢，畀咗人都唔會心痛，預咗如果有人要搶要偷，一攞就係咁多，如果要埋手錶就畀埋，不過好彩至今都未試過。