政情：料樓市難大跌 楊釗籲置業睇定啲
本港樓價高企，要買樓的確唔容易。香港中華總商會永遠榮譽會長楊釗早前出席一個活動時就提到，雖然過去一段時間樓價已回軟，但係如果市民想置業，依然要「睇定啲、謹慎啲」。因為雖然市場上對住宅嘅需求依然好大，但相信樓市想再增長會有一定阻力，不過期望樓市大跌嘅可能性就唔大喇。
指政府須保住高就業率
近年市場湧現唔少納米樓，楊釗認為係應市場上嘅需求而生，因為每個人都希望自己有個「竇口」，如果單位較細、價錢較低嘅話，的確可以吸引到人買。至於樓市下跌，會唔會對已經買咗納米樓嘅市民有好大影響，楊釗就認為，買納米樓嘅市民係自住居多，好少用嚟炒賣，只要佢哋份人工供得起，最多蝕少少，問題唔會好大。講到尾，佢話政府必須保住社會上有高就業率，以免因為市民失業而引起大問題咁話。