政情：陳勇屋企過節食飯 菜式多元化似自助餐
中國人好重視大時大節，通常都會一家人食餐飯。新界社團聯會理事長陳勇就話，過時過節通常都係喺屋企食飯，佢媽媽唔止會煮廣東菜餚，仲會包餃子、煮東南亞風味嘅煎炸食物，冬至仲會整暖笠笠嘅羊腩煲，總之食物好多元化，難怪佢話喺屋企食飯好似食自助餐咁啦。
陳勇係福建人，不過媽媽就係北方人，戰亂時家族南遷，所以唔止煮得一手好味嘅廣東菜，亦會跟番北方人嘅傳統煮餃子。而佢爸爸鍾意東南亞菜口味，喜歡食煎炸嘢，所以佢媽媽都會整埋。咁佢自己又鍾意食乜呢？點知陳就話︰「最緊要食飯」，真係估佢唔到。
一放假就會食到肥晒
陳又話，平時工作忙碌，經常離港，所以放假就會留喺屋企「補眠」，最多都係同屋企人出街周圍行吓。由於媽媽廚藝了得，所以佢一放假就會食到肥晒，不過好彩回復工作後就會瘦番，所以都冇有怕喇。