政情：范國威孖「福到俠」擺街站
唔少立法會議員或者區議員都會化身唔同造型，開設街站氹吓街坊開心，新民主同盟立法會議員范國威（Gary）近日就有「福到俠」同佢一齊擺街站。福到俠到底來者何人？其實佢係Gary嘅黨友、大埔區議員關永業嘅二公子。
幫關永業二公子打扮
Gary話，當日同關永業及另一大埔區議員周炫瑋喺大埔擺街站，關就帶埋二仔嚟幫手。平日擺街站多數都係派吓宣傳品，同街坊傾吓偈，有時擺足幾粒鐘。Gary擔心小朋友會覺得悶，所以趁佢搵個紙箱笠住個身時，就靈機一動，用紙箱整埋套盔甲出嚟氹佢開心，連頭盔都整咗三款添！
唔單止幫手打扮，Gary仲幫呢位小朋友嘅造型改個名做「福到俠」，因為當日佢哋係派福字月曆喎！咁有創意，唔知Gary會唔會參考下啲卡通片，整番個戰隊系列出嚟呢？