今日係聖誕節，相信大家已經諗好節目點樣慶祝喇！至於人氣高企嘅日本寫真界童顏巨乳掌門人天木純又會點歡度佳節呢？佢就話會喺工作中度過，仲會忙到年尾，相當充實，而佢最希望可以同粉絲打番鋪麻雀過吓手癮兼聯誼喎！
江山代有人才出，雖然日本寫真界最有資格成為童顏巨乳代表嘅篠崎愛仲有繼續拍寫真，最近更慶祝出道10周年，不過愛妹近年專注歌唱事業，想佢喺寫真界有突破性發展就好難喇！不過大家唔使擔心，近幾年寫真界出現咗好多優質之才，當中包括今日同大家見面嘅天木純。
23歲嘅天木純人如其名，氣質夠晒清純，一副天真無邪嘅面孔相當惹人憐愛，配合極具「破壞力」嘅身材，簡直引死人，又點會唔火速走紅吖！ 所謂「破壞力」唔係破壞建築物或者傷害大家嘅身體，而係破壞大家嘅忍耐力防線，因為天木純嘅胴體白雪雪又鮮嫩，胸前對純天然I奶更加係大得誇張，堪稱巨乳中之極品！好彩係睇寫真咋，如果親眼見到純妹呢對I奶，真係好難估計會做出甚麼事來呀！
好多人都知道「仮面女子」為日本最強地下樂團嘅團體，初出道時每個成員都戴上面具上台表演，相當神秘，但係就身穿熱褲同比堅尼示人，最引人入「性」係個個都上圍豐滿，而天木純就係「仮面女子」初代成員之一喇！家陣天木純作個人發展，可以話要風得風，要雨得雨，喺上年年尾埋單計數，做雜誌封面嘅次數有13次咁多，為眾多寫真女郎之冠。
今年純妹繼續喺寫真界發力之餘，仲會作多方面發展，除咗為日本職業格鬥賽事「Knock Out」做舉牌女郎，仲會拍電影添。早前純妹表示2018年對佢嚟講係相當充實嘅一年，咁有咩未來展望呢？佢話想試吓舉行多啲唔同類型嘅活動同粉絲見面，最好就係打吓雀局聯誼一下喎！如果係真嘅話，純妹記得預埋我呀！
簡介：天木純近期工作極為繁忙，除咗出席新戲宣傳會，仲會舉行攝影會同大家見面，從其社交網當中可以見到純妹換上性感聖誕裝畀大家瘋狂攝影喇！
網址：https://twitter.com/jun_amaki?lang=ja
年齡：23歲
身高：4呎10吋
三圍：38I-24-35
撰文：賢