中環出更：玩嘢 張超雄阻「抗日勝利紀念日」列法定假
早前有立法會議員建議將「孔聖誕日」訂為公眾假期，不過就未有新進展。而勞工界立法會議員潘兆平就已計劃於立法會大會提出議員議案，促請政府檢討假期政策，將中國人民抗日戰爭勝利紀念日列為法定假期。之但係議員張超雄就「玩嘢」提出修正案，將潘嘅原議案改頭換面，並要求政府將現有五日不屬法定假期嘅公眾假期改為法定假期。
將潘兆平議案改頭換面
潘所提出嘅議案係希望政府將「中國人民抗日戰爭勝利紀念日」列為法定假期。而張提出嘅修正案就將議案中「中國人民抗日戰爭勝利紀念日」字眼刪除，改為「五天不屬法定假日的公眾假期，即耶穌受難節、耶穌受難節翌日、復活節星期一、佛誕及聖誕後第一個周日」。該議案預計喺下月九日嘅大會上辯論。
現時香港每年嘅公眾假期有十七日，而俗稱「勞工假」嘅法定假期只有十二日，少咗嗰五日正正就係張喺修正案提出嗰五日。過去唔少勞工團體都希望政府可以將勞工假同公眾假期睇齊，劃一為十七日，但政府咁多年嚟都冇反應。潘提出嘅議案只係無法律約束力嘅議員議案，所以就算獲通過，政府都唔一定要聽議員支笛嘅。
卓妮