中環出更：吳宏斌酒量好 全靠細個食酒糟炒蛋
唔少商界名人都鍾意飲酒，而且酒量好好，中華廠商聯合會會長吳宏斌（斌哥）同香港工業總會主席郭振華（Jimmy）就係表表者。早前喺一個酒展晚宴上，兩人傾開呢個話題，原來佢哋咁好酒量都同童年成長背景有關。不過斌哥嘅酒量就唔係直接飲酒訓練出嚟嘅，而係食酒糟炒蛋喎。
斌哥笑笑口話，細個時老媽子經常自釀糯米酒畀爸爸飲，酒糟就用嚟炒蛋，酒糟嘅酒精含量都好高，所以佢哋兄弟姐妹個個都好飲得，佢自己就廿年嚟都未醉過喇。千杯不醉咁勁？斌哥笑住澄清話，未醉過係因為識得節制，知道自己就嚟醉就唔飲，所以佢都勸大家唔好逼人飲酒，以免累事。
郭振華五歲開始飲酒
Jimmy嘅飲酒史仲誇張，佢話五、六歲就開始飲酒，事關佢係湖南人，當年聚居喺深水埗，過年時好興到人哋屋企拜年，而且家家戶戶都會用自家釀嘅米酒招呼老友。當時Jimmy經常跟住爸爸去拜年，有時淨係一個朝頭早就去咗十幾個人屋企，爸爸經常飲醉咗就唔使講喇，Jimmy都有飲，所以依家酒量好，相信都係咁訓練出來嘅。
同場仲有香港品牌總商會會長王偉、香港珠石玉器金銀首飾業商會理事長黃紹基、毛織創新及設計協會主席梁嘉彥及香港表廠商會名譽會長莊學海等。黃紹基啱啱去咗泰國考察當地寶石市場，話喺中美貿易戰不明朗嘅情況下，業界要搵定後路。近十幾年泰國主力發展寶石加工及批發，尤其係喺歐洲市場發展唔錯，所以特登帶業界去睇吓喎。
卓妮