政情：遙控車變拉繩車 洪為民收禮物「中伏」

Witman出席活動時憶述讀初中時爸爸向佢承諾，如佢成績達標就會送佢一架遙控車，佢最終都做到，但爸爸就只送咗一架要用繩拉郁嘅車，同遙控車似乎係兩回事。佢就話明白當年家庭資源無咁充裕，一架遙控車要成三位數字，當時嚟講算係好貴，所以完全明白爸爸嘅苦況。

父內疚多年 叫佢對囝囝好啲

雖然Witman體諒爸爸，但佢爸爸反而對呢件事好內疚，過咗好多年仍會提起呢件事，更千叮萬囑叫佢唔好學，仲叫佢要對自己囝囝好啲添。

另外，Witman對遙控飛機都好有興趣，至於航拍機佢就嘆冇時間玩。不過有次佢同朋友去旅行時揸船，就因船速太快同操作中嘅航拍機中止連線，好彩部機只係原地旋轉，冇跌落水，真係驚險咁話。