政情：以退為進 梁福元轉戰區會 推大仔入鄉委會

同程振明已鬥足十幾年

梁福元先後做過三屆十八鄉鄉事委員會主席，佢形象鮮明、言論突出，好似號召村民集體抵制政府嘅僭建物申報計劃，又講過不惜流血抗爭，所以都算係近年鄉事派中最有代表性嘅人物之一。不過，梁出戰鄉委會並非一帆風順，二○○七年爭取連任又輸畀鄉事重量級人物程振明而斷纜，直至一一年再以一票之微險勝程振明收復失地，兩人喺過去十幾年可謂互有攻守。

近期有地區人士透露，梁福元的確無意喺下屆再選鄉委會，在鄉事協調下，十八鄉鄉委會主席之位在事隔十多年後重回程振明手中，但過去甚少曝光、梁福元嘅大仔梁智峯將會進入鄉委會並取代副主席林添福之位，而梁智峯早前都有以社區幹事身份落村清理塌樹，以增加曝光率，據悉，林添福喺協調下，會轉戰選舉管理委員會臨時建議中，新增嘅十八鄉北選區。

根據《區議會條例》，鄉委會主席會自動成為區議會當然議員，換句話梁福元放棄連任鄉委會主席，將會連元朗區議員身份都冇埋。咁啱程振明係元朗區議會十八鄉西民選議員，如果程真係做咗鄉委會主席，其民選議席就會懸空須進行補選，聽聞梁福元唔做鄉委會主席後，就會爭取程振明個民選議席。

薪火相傳 要睇阿仔興趣

此外，梁福元嘅二子梁明堅為現任元朗十八鄉中區議員，兩父子一直並肩上陣，若然梁福元真係轉戰民選議席就好大機會繼續直選，加上明年十八鄉將會再多一個選區，鄉事喺議會中嘅勢力或會更大。

梁福元接受查詢時承認，應該會從鄉委會退落嚟，但就會調換不同崗位，做區議員機會較大，因為十八鄉有幾個議席要協助啲後生，而且以前無做鄉委會主席時都做開民選區議員。至於大仔就睇佢興趣，畀後生認識鄉事政治同新界傳統可以做到薪火相傳，而程振明係鄉委會主席其中一個重點考慮人選，但選舉始終公開公平，有能者當之。