中環出更：方潤華印紙仔分享養生之道
城中知名慈善家方潤華（方伯）早前喺灣仔一間酒店大排筵席，慶祝佢同爸爸方樹泉創辦嘅集團成立七十周年，九十四歲高齡嘅方伯精神奕奕現身，個仔香港中華總商會（中總）常董方文雄亦帶埋兩個仔添輝同添明一齊招呼數百名賓客。中總常董黃周娟娟、永遠榮譽會長霍震寰都有到場，兩人都話家族同方家有三、四代交情，認真唔容易。
黃太笑笑口話，佢爸爸及老爺都同方伯相識，下一代亦都係朋友。大家都知方伯鍾意寫嘢與人分享，曾經發表數以百計嘅文章。黃太都有體驗，佢話以前會收到方伯寄嚟嘅書仔，後來發展到見親面時，方伯就會喺衫袋中攞張影印嘅紙仔出嚟，上面係啲處世同養生之道。黃太形容好可愛，亦得益良多，比塞錢落佢袋更加值錢咁話。
霍震寰忙搞奧運武術比賽
霍震寰亦細數霍家同方家嘅四代情，佢笑指最近忙於搞奧運武術比賽，事關佢係亞洲武術聯合會主席。講開最近日本為咗籌備主辦下一屆奧運會，特意引入人臉識別系統，以便選手及參加者盡快入場，唔使熱到暈。霍就話係好事，記得十年前參加北京奧運時都熱得好緊要，當時有啲外國人熱到匿埋去廁所。點解？因為只得廁所有冷氣囉！
香港教育大學校長張仁良同嶺南大學校長鄭國漢都有到場，張仁良盛讚方伯熱心公益，捐助教育項目超過五百個，所以一定要嚟支持。傳承學院榮譽主席陳裕光就話企業捱過七十周年，就一定會順利成為百年企業，事關每十年係一個關卡，過咗七個十年，百年就指日可待喇！
卓妮