中環出更：殯儀館廣告位 蔣麗芸讚位置好
最近九龍西出現唔少直幡同橫額廣告，當中以紅磡一棟單幢樓外牆嘅最為搶眼，但喺正殯儀館後面唔多吉利囉！不過，循九龍西地區直選進入立法會嘅議員蔣麗芸（Ann），竟然話位置幾好，仲叫助理多留意。唔通咁百無禁忌？
叫助理留意後先知中伏
話說有人向阿Ann展示呢一個話題十足嘅廣告，佢一見到就大讚呢個位置幾好，仲立即同助理講要留意吓，如果有機會用呢個廣告位都幾好喎，估唔到阿Ann思想咁開放，連殯儀館嘅廣告位都唔介意，而且仲睇得出佢夠彈藥同眼光，事關呢個廣告位價錢估計要六位數，但每日咁多人經過紅隧，相信唔少人都望得見。
不過，當阿Ann讚完一輪，又吩咐完助理之後，現場就有人溫馨提示，話呢個搶眼廣告牌喺位於殯儀館後面。呢個時候阿Ann先知自己中咗伏，即刻借咗聾耳陳隻耳，急急腳走番入去立法會大樓內，睇嚟向來聲大大嘅阿Ann都唔係無嘢忌o架，只係唔知呢個位置喺殯儀館後先有興趣啫，估計市民無緣喺紅隧口見到阿Ann喇！
卓妮