中環出更：娶容海恩袁彌昌放閃「最好嘅選擇」
新民黨立法會議員容海恩（Eunice）同該黨政策總裁袁彌昌嘅婚訊傳出唔夠兩個星期，兩人就迅速拉埋天窗，尋日喺尖沙咀一間酒店舉行婚宴，擺咗四圍宴請親友。作為新郎哥嘅袁賣口乖放閃光彈，話今次係佢「最好嘅選擇」，而新娘Eunice就大讚老公對佢好好，最緊要一直都咁好喎。一直對感情事低調處理嘅佢哋終於可以公開晒恩愛喇。
尋日約下午一時，新娘子Eunice一身純白色婚紗、手持粉紅色花球現身酒店，當時佢嘅左手無名指已經戴上婚戒。政圈盛傳佢奉子成婚，但呢位貪靚嘅新娘仲着住斗零踭行落樓梯，睇見都戥佢擔心。好彩身穿黑色禮服嘅新郎袁彌昌非常體貼，幫Eunice提起裙襬，更拖到實一實。
Eunice就話，結婚真係唔容易，因為有好多程序，但佢就唔認婚禮安排倉促，話個個結婚都要忙住安排賓客。而袁被問到係咪就快做爸爸時，就話有好消息嘅話就會公布，佢哋都好想有小朋友咁話。
至於Eunice媽媽就喺擔當姊妹嘅立法會議員麥美娟（Alice）陪同下，主動現身分享嫁女嘅喜悅。佢大讚女婿有一百零一分，非常滿意。但被問到Eunice係咪有咗時就非常口密，竟然話自己唔清楚，而Alice亦都幫手護航。Alice又透露，接新娘時要新郎食香蕉、提子等生果，而袁就一邊做掌上壓一邊食，聽落都辛苦，好彩袁只係做咗幾下，姊妹就放過佢喇。
袁彌明林雨陽兜路行
袁彌昌妹妹、人民力量前主席袁彌明同老公林雨陽都有到場，但就好低調咁兜路行，唔知係咪怕畀人問起點睇大嫂時唔識答。而新民黨主席葉劉淑儀（葉劉）同副主席潘國山亦親自去慶賀，葉劉仲祝福一對新人早生貴子同準備咗銀行禮券作為禮物，話等新人自己揸主意點用喎。
卓妮