中環出更：病人投河自盡陳家亮自省醫人行先
唔少醫生都會認為病人教識自己好多事，中大醫學院院長陳家亮亦唔例外，佢尋日出席新書講座時，提起一位時常肚痛便秘來求醫嘅女病人，當時冇乜醫生自願睇佢，自己有日心情特別好，聽佢講嘢半個鐘後，呢位病人之後就指定要佢診症，每次同佢傾完偈都會開心啲，腸胃不適亦減少。但陳家亮其後要考專科試，時間不足因而疏遠呢位病人，呢位病人後來失蹤，再過半年，就聽到呢位病人投河自盡。
陳家亮覺得如果無吝嗇自己嘅時間，結果可能會唔同，自此成日提醒自己同學生，若覺得病人嘅事比自己嘅事重要，就係一個有德行嘅醫生。佢認為教學生最有效嘅方法係身教，提起曾跟中大醫學院前院長鍾尚志巡房同入手術室，鍾唔多出聲，喺手術室發脾氣又會掟刀，但喺鍾身上學識對病人好肉緊，指鍾唔食飯唔瞓覺都要醫病，就算鬧病人，病人都會知係為自己好，但又笑指唔會學鍾掟刀同唔睬學生。
張宇人想娶多幾個老婆洗碗
嚟撐場嘅中大校董會主席梁乃鵬話聽呢個講座「勝讀四十年書」，陳家亮即係笑指係咪想減佢人工，原來陳家亮尋日朝早見過中大校長，校長同佢講笑指，「你有時間寫書即係得閒啦，一係做多啲嘢，一係減人工」。
立法會飲食界議員張宇人亦出書講業界故事，佢竟然當住太太面話，計劃喺立法會提出動議恢復一夫多妻制，希望娶多幾個老婆喎。唔怕老婆扭耳仔咩？佢話得一個老婆唔夠洗碗，要娶多幾個洗多啲，同埋可以生多幾個小朋友。係講笑啫！佢大讚女士係從事飲食業男士嘅幕後功臣，因為經營飲食變化大，再加上有最低工資、遣散費等負擔，所以背後嘅屋企人壓力更大。
尋日生日嘅議員鄭泳舜亦到書展，因為佢有份聲演一本會發聲嘅歷史書做蘇秦，呢本歷史書依家係由食物及衞生局前政治助理陳凱欣任職嘅一間社企出版，陳凱欣仲喺攤位播出鄭喺書入面把聲添！
卓妮