中環出更：倡司局長短問短答 梁君彥爆遇高官阻力
立法會本立法年度引入特首「短問短答」環節，立法會主席梁君彥尋日出席前立法會議員劉慧卿嘅網台節目訪問，提及司局長到立法會回應議員口頭質詢時亦可以參考，唔使每次花時間讀出預先寫好嘅提問同答案，梁君彥又爆料此事有高官、政務官嘅阻力，會喺議事規則委員會再作商討。
議會劍拔弩張源自議題
另一方面，泛民議員多次公開質疑梁君彥處理會議的手法，形容為「吹黑哨」，梁君彥於網台節目解釋，議會嘅劍拔弩張非始於佢本人，而係來自議題本身有爭議，加上政府及法案委員會未能解決問題，因此自己要喺大會「硬處理」。佢又稱，除咗修改《議事規則》及高鐵一地兩檢方案曾出現劍拔弩張場面，議員於其餘時間均可以暢所欲言。
對於梁君彥上月主持大會，限時三十六小時審議高鐵一地兩檢法案惹來爭議，曾任立法會財務委員會主席多年嘅劉慧卿質疑，梁君彥事前有否充分諮詢各黨派議員意見，梁君彥回應稱限時三十六小時已足夠，重申政府冇喺審議高鐵一地兩檢時給予任何要求及壓力，而且議會尊嚴同樣重要。梁君彥話︰「當然我心諗嘅嘢同佢哋（泛民）想要嘅嘢梗係有段距離，咁至會形成大家有個好激烈爭拗」。
卓妮