政情：公民講場：供應少得可憐 居屋大平賣又點？

樓價高踞不下，市民上車難搞到怨聲載道。房協主席鄔滿海尋日提出調整居屋折扣，可以調低過七折，又話以前都試過四折出售，睇嚟佢亦認同目前居屋售價高到市民都買唔到喎。不過，依家香港樓市最大問題係單位供應不足，好似房屋署月中截止申請嘅新一期居屋咁，就破紀錄超額申請三十六倍，所以房協點賣大包調低售價都好，供應唔夠嘅話，市民咪又係得個睇字。