中環出更：做工業愈難愈好玩 譚偉豪：似足追女仔
香港工業總會（工總）旗下嘅香港電子業總會（總會）早前舉行三十周年慶祝晚宴，工總主席郭振華、總會主席莊子雄同城中工業界人士齊出席。今年總會特別設立「香港電子業傑出成就獎」，以表揚業界翹楚，有份獲獎嘅立法會資訊科技界前議員譚偉豪笑稱，做工業好難、好苦，但係愈難愈好玩，就好似追女仔一樣，愈難追到先至愈刻骨銘心喎。
譚偉豪妙語連珠，都係想吸引多啲人投身工業啫！今時今日凡事講求創意，譚偉豪自嘲愈老愈冇創意，所以就拍住工總前主席鍾志平同香港電子業商會會長吳自豪等好友成立一個天使基金，專搵有潛力嘅投資項目。唔知係咪對電子業有情意結，現時佢哋投資嘅項目之中，電子業就佔咗三、四成。
王賢敏話女士入行有優勢
當晚獲頒傑出成就獎嘅仲有仁濟醫院顧問局名譽主席王忠秣同委員嚴玉麟、「耳機大王」楊志雄、總會副主席謝鴻強、鍾志平同吳自豪等。王忠秣嘅女兒王賢敏（Ada）代父出席領獎，Ada現時喺公司幫手，主要負責財務及採購，佢讀工業工程出身，係實力派嘅富二代。問佢女仔做工業有冇難處，佢笑稱依家好多青年工業家都係女士喇，女仔做工業唔止冇難度，仲有優勢添，因為有「軟組織」喎。
莊子雄就話香港係亞太地區重要嘅電子零件貿易中心，電子業嘅出口總值佔本港整體出口高達六成六，係最大嘅出口支柱。故此希望政府繼續推出合適嘅政策，助本地電子業拓展海外市場。
卓妮