政情：民記鼎住晒 建制趁機踩

立會新丁周浩鼎身陷困局，泛民當然要趁機窮追猛打，迫使佢辭去專責委員會，又打算動議取消佢嘅議員資格。正當佢四面楚歌之際，民建聯黨主席李慧琼只係批評周浩鼎政治敏感度不足，相比工聯會同新民黨等其他建制派落力狂插，民記明顯係錫住自己人。

工聯會理事長吳秋北喺facebook狠批周浩鼎「顢頇」、「愚不可及」，而工聯會榮譽會長陳婉嫻亦喺周浩鼎未決定辭去專委會副主席之前，企出嚟要求佢退出。至於新民黨主席葉劉淑儀亦指周浩鼎喺事件中處理程序不當，應自行退出專委會。

民記唔讓路 圖推兩新丁上陣

點解工聯會趁機落井下石呢？一切皆因選舉恩怨。早喺上年立法會選舉時，工聯會王國興與周浩鼎競爭有「超級區議會」之稱嘅區議會（二）功能界別末席，後來王國興敗選，工聯會一直深深不忿，雙方因此結怨。不過，游梁兩人被取消議員資格，引發新界東及九龍西補選，令王國興翻身有望。之不過喺九西已有一席嘅民建聯唔想讓路，企圖推第二梯隊葉傲冬或鄭泳舜上陣，令工聯會更為不滿。

新仇舊恨交織之下，難得今次民建聯議會新丁搞出軒然大波，工聯會仲唔借勢煽風點火，令事件繼續延燒，以凸顯民建聯新人嘅質素一般，希望建制派會改為考慮工聯會中有議會經驗嘅人選，例如王國興或鄧家彪囉！

此次風波可算是工聯會期待已久反咬民建聯的大好機會，犯錯的周浩鼎無可避免要硬食同路人的攻擊，但就分分鐘連累原本有機會上位的葉傲冬及鄭泳舜了。

至於新民黨方面，由於前副主席田北辰退黨，葉劉都要為該黨尋找機會以及培育新人，早前佢已講過想參加補選，故此佢都插埋一份。今次事件顯見建制派各懷鬼胎，相信剝花生睇戲嘅政壇人士都睇得津津有味喇！