香港嘅長者牙醫服務一直為人詬病，政務司司長張建宗（小肥張）尋日落區，去咗深水埗榮昌邨及富昌邨家訪兼派禮物。期間一位獨居婆婆同佢反映，長者醫療券嘅錢唔夠睇牙醫。點知小肥張教長者儲起醫療券嚟睇牙喎！醫療券金額每年得二千元，就算累積亦有四千元上限。依家鑲牙、植牙動輒要過萬元，就算老人家唔睇病，慳埋醫療券嚟睇牙，最多都只得四千元，唔通叫啲老人家剝咗牙唔鑲番，或者鑲一半冇一半咩？
