我有正能量：師友同行

「從來無諗過可以拖住一個老師，放心同對方講任何事。」中二同學Yuki一邊說，一邊將臉輕輕靠在Jessica肩膀上，二人親近如兩姊妹。「最深刻係有次我輸咗朗誦比賽，忍唔住喊，Miss Jessica喺隔籬一直陪住我，話畀我知呢次比賽唔係最後一次。」

Jessica於上一個學年才成為香港道教聯合會圓玄學院第一中學的一分子，她既非教師，也非社工。在學校，同學們都稱她為Mentor（導師）。當年大學畢業後，她加入了非牟利機構「教育無邊界」，受訓成為駐校「啟導友師」，Yuki是她的其中一位Mentee（導生）。教育支援是啟導友師工作的一部分，例如協助教授英語，但他們有更重要的任務——撩學生做「Friend子」。

Jason將校園一角打造成「英語咖啡屋」，深受同學歡迎。（受訪者提供）	校長文靜芬大讚兩位啟導友師極具親和力，令校內多了歡笑聲。	學校壁報上貼滿同學與兩位啟導友師的生活照。

課外聚腳 建立親密關係

「呢個身份教學負擔無咁重，有更多時間觀察同學喺課室以外嘅一面，可以同佢哋建立私人少少嘅關係。」Jessica指「重返校園」一年半以來，最滿足是看見同學在自己的鼓勵下突破自我，以及見證着他們細微的轉變。「有個同學仔喺學校無乜自信心，有次邀請我去睇佢參加課外活動，我先發現佢打空手道時原來好有熱誠！有時可能學生都唔知自己有呢一面，而作為Mentor就可以同佢分享睇到嘅分別，畀佢了解到自己係有能力。」

「教育無邊界」邀請了廿位不同職業人士，擔任「真人圖書館」嘉賓與學生作分享。（受訪者提供）

Jason（中）曾邀請外籍人士（左）與James（右）一同行山，藉此讓他有更多機會練習英語。（受訪者提供）

如何讓學生敞開心扉，是啟導友師的重要命題，Jessica的同校拍檔Jason便運用了桌上遊戲這個法寶，再加上零食和飲品，將校園一角打造成「英語咖啡屋」，旋即成為同學們的聚腳點。經常來「蒲」的中四同學James指，Jason很喜歡「捉」人去嘗試新事物，像是要他跟外籍老師交談、教低年級同學玩桌遊等。「上次佢同我去行山，竟然帶咗個外國人嚟，最初仲擔心成程焗住要講英文，但之後諗番又幾新奇，其實無需要咁驚。」

平排共處 互相反思學習

這種亦師亦友的關係，Jason將其形容為一碗魚蛋河，就像魚蛋與河粉要放在一起，味道才相得益彰，「我哋同學生係處於一種平排嘅關係，互相學習成長，有時反而係同學令我睇到自己有咩不足。」他又提到現時的教師在學校經常要身兼多職，難以抽時間照顧同學在學業以外的需要，而啟導友師正好可提供此方面的輔助。「我哋希望畀同學知道學校除咗讀書，仲有人幫助佢、支持佢，可以放低自己嘅憂慮同不快，或者係交流對人生嘅睇法，等學生可以更舒服咁喺度學習同成長。」

圖：朱偉坤

文：林幸泉