政情：今日你上鏡：區詠芷為宣傳 用大嘥鬼鈴聲
為宣傳減少浪費而出生嘅「大嘥鬼」已經深入民心，每晚睇電視都會見到大嘥鬼宣傳片，而大嘥鬼尋日更由公仔箱跳到立法會，立法會會議室外竟然出現大嘥鬼嘅歌聲，原來係同環境局局長政治助理區詠芷（Michelle）有關！
黃錦星電話長期靜音
立法會出現嘅大嘥鬼歌聲係來自Michelle嘅電話，因為佢將電話鈴聲設為大嘥鬼宣傳歌，仲話覺得好好聽，每次電話響都能夠引人注意，可以乘機宣傳環保意識。佢之前都用過大嘥鬼講氣候變化嘅宣傳曲做鈴聲，而今次大嘥鬼嘅新歌就同可回收紙品有關。Michelle仲爆料話環境局局長黃錦星冇用大嘥鬼鈴聲，因為佢個電話長期靜音喎。