政情：晏紫喜獲雙胞胎 三胎抱四失預算
中國女子網球名將晏紫已經第二年出任東華三院總理，佢日前就出席東華三院活動，當日佢老公李聖根同大女Iza都齊齊現身。晏紫講笑話自己係代表老公做總理，因為老公喺東華旗下嘅中學畢業，同東華好有感情。佢老公早幾年都做過兩屆總理，不過之後就因為太忙而退出，所以就改為支持作為太太嘅佢「代夫出征」。
打網球當親子活動
晏紫嚟香港定居已經接近七年，平時就忙於湊小朋友，笑言已經好少打網球喇，最多都係同六歲大嘅囡囡打，當做親子活動。佢話，囡囡都學緊打網球，不過係請人教，因為阿女冇耐性畀佢教喎。
講開仔女經，晏紫自爆四個月前啱啱生咗第三胎，仲要係雙胞胎添，加埋大女同今年三歲幾嘅大仔，結果屋企就添咗四名小豆丁。晏紫都忍唔住笑笑口話，原本結婚時同老公計劃生三個，點知真係失晒預算喎。