政情：林超英嘆木棉樹變「漏電」英雄
好多人吹捧外國英雄電影，例如超人、蝙蝠俠同鐵甲奇俠等，依家又出咗漏電「英雄」喎大家有冇聽過呢？究竟搞邊科？其實呢位「英雄」到咗春天都會喺大家身邊。估到未？開古：咪就係「英雄樹」囉！點解漏電？都係因為氣候暖化所累。
氣候暖化 好自為之
天文台前台長林超英日前喺Facebook貼文，話屋企附近嘅木棉樹樹頂開花，但對捱過舊年冬天嘅殘葉同今年新長嘅綠葉，境況頗為蕭瑟，毫無以往春天全樹無葉同紅花怒放嘅豪邁景象，都係氣候暖化衍生嘅現象。
佢解釋，以前木棉嘅生命周期符合秋收冬藏嘅原理，即係冬天樹葉全部凋謝掉落，令樹木可儲起能量，留番春天時大朵紅花盛開，展示「英雄樹」嘅英姿，但係今年冬天唔夠凍，應落嘅樹葉不枯不凋而留喺樹上，結果冬天期間繼續吸取樹木嘅能量供養自己，情況有啲似電池漏電咁，最終半樹綠葉、半樹紅花。就因為咁，咪變咗漏電「英雄」囉！
咁今年一、二月有幾天稍冷，有港人就質疑氣候暖化嘅講法，佢就話氣候暖化係講以百年計嘅總趨勢，唔係香港有幾日凍唔凍就知道，又話木棉樹唔似人類會講大話，仲叫市民好自為之添！