政情：選舉處大嘥鬼 點票箱隨街丟
立法會補選啱啱完結，相信花咗過億公帑，原來負責搞選舉嘅選舉事務處係大嘥鬼。人民力量嘅歐陽英傑尋日喺Facebook上載照片，見到點票箱被人隨街丟，認真浪費公帑呀！佢貼文話「哇。補選完，票站物資成了垃圾，垃圾桶唔夠位擺，擺晒在外面，破壞法治！」冇錯，隨街丟垃圾係犯法！
歐陽英傑接受查詢時透露，尋日下晝四點幾喺建華街長康街交界、北角衞理小學對出發現呢堆點票箱，估計係有人丟出來嘅。翻查資料，北角衞理小學係票站之一。
我哋去到嗰度亦見到堆點票箱，曾經裝過尊貴嘅選票，依家其中一個箱內就有疑似薯片包裝袋，仲有一個箱有搓埋一舊嘅紙團，希望呢張唔係選票啦！其實呢啲箱點便宜都好，都係公帑，香港不時都有選舉，絕對可以重用，咁樣丟法，連網民都寸「（環境局局長）黃錦星講吓嘢」。
須放場內一角待處方回收
選舉事務處回應指，按照指引，當選舉完結後，投票站工作人員須清理場地同將選舉物資放喺場內一角，以便處方回收物資。處方正跟進了解事件，會喺日後嘅選舉中加強培訓，提醒投票站工作人員相關事宜。