政情：自決派冇運行 黃之鋒易坐監 戴耀廷恐招災

楊師傅指，以面相睇，黃之鋒唔似搞政治，搞政治一定要上唇薄先會成功，否則會較吃虧，建議佢諗吓做第二樣好過。黃之鋒係弱水命，忌土，今年係戊戌年，會好大鑊同唔吉利，佢係官殺混雜，凡係官殺混雜嘅人，如果係弱命，特別容易坐監，最麻煩係五、六、九月，今年坐監機會好高。至於梁國雄係弱水命，忌土，六十二歲後，即係今年開始冇運行，就算幾有政治魅力，成功機會都好低，運過即止，佢行咗十幾年金水運，依家行土運，個運就壓制佢，土剋水，尤其今年，大運又戊戌，流年又戊戌，雙重忌神，搞得唔好，農曆五、六、九月，分分鐘要入監房休養吓。

戴耀廷係水命，楊師傅指佢行七殺運，七殺即係強硬、囂張，但佢較敏感，大運係丙子，有啲幫助，農曆六、九月，如果佢有大動作會招災，一定係拉佢，最終有冇事就唔知，農曆十二月係最差，丑戌未三刑，佢係水命，咁多土窒住佢，好似水倒落土咁，會被索晒，即係幾強硬都好，因為抵制壓力太大，若今年唔想惹官非，最好收口，尤其農曆六、九、十二月都易犯官非。

游蕙禎「愈幫愈忙」 宜閉關進修

至於年輕本土自決派嘅運程，楊師傅話游蕙禎如果以正格睇，衰到冇運行，逢係呢種八字正格，行到呢個運，一定冇運行，雖然仲有政治魅力，但係曇花一現，對他人會愈幫愈忙，幫人助威吶喊會反效果，今年完全冇運行，如果唔乖乖哋，會同大運對着幹，會好大壓力及吃力不討好，如果要行運要三十歲後，呢三年應該閉關進修吓，如果呢三年hea，三年後政治魅力都不大。而游蕙禎嘅黨友梁頌恆，楊師傅話佢行出嚟都冇政治魅力，唔好行出嚟好過。

被取消立法會議員資格（DQ）嘅香港眾志主席羅冠聰係九三年出世，屬雞，乙木命，財生殺旺，姻緣同桃花運方面，容易吸引某類人，但佢兩面不是人，風吹一吹就歪咗，個運對佢嘅衝擊太大，可以由天上落到地獄，八字唔強，水木用神，依家財強身弱，表面風光，行出嚟好似好威，但內心世界好虛，冇底氣，平平無奇，不論做唔做議員，都要三十二歲後才有運行，今年唔多好運。

同樣被DQ嘅劉小麗係七六年出世，屬龍，雖然沖太歲，但冇事，丁火命，木火用神，但今年木火唔旺，土太勁，大運同流年對着幹，唔樂觀，覺得佢不如返去教書，但早前被揭與四眼男同遊台灣嘅佢，喺姻緣方面就有好消息，楊師傅批算，劉小麗二○二○年「唔嫁都幾難」，就算唔嫁都同居，出嫁機會非常非常大。