中環出更：暴亂後 搞事四人幫密會
旺角暴亂於年初一晚上至年初二凌晨發生，係自六七暴動後最嚴重嘅暴亂，政商界口徑一致批評暴徒掟磚頭、四處縱火等行徑。事有湊巧，旺角暴亂發生剛好滿一周，「搞事四人幫」壹傳媒集團前主席黎智英（肥佬黎）、外號「李漢奸」嘅民主黨創黨主席李柱銘、「民主阿婆」前政務司司長陳方安生，及「反叛主教」天主教香港教區前主教陳日君齊集肥佬黎位於何文田嘅寓所，莫非眾人趁機檢討旺角暴亂嘅政治局勢，密謀再次攪局？
尋日係年初八，搞事四人幫前後腳抵達黎宅，係踏入猴年後首次密會。尋晚約六時二十分，肥佬黎嘅司機駕駛私家車返回黎宅，民主阿婆、陳日君及被傳媒報道曾收取肥佬黎捐款、疑似劉勝義神父嘅外籍男子亦於車內。而事隔五分鐘後，李漢奸及其太太亦乘私家車抵達，然後一齊步入黎宅。
及至晚上九時十五分，眾人密會歷時約三小時後陸續離開，其中陳日君及疑似劉勝義嘅外籍男子，分兩部私家車離開。至於民主阿婆今次選擇聯同李漢奸夫婦同坐一部私家車離開，莫非民主阿婆有事要單獨同李漢奸再密密斟？
卓妮