政情：少時「三步不出西營盤」 岑智明呻慘
年輕人都鍾意同朋友出街玩、食吓飯，不過對後生時嘅天文台台長岑智明嚟講，原來都係一個「奢侈」嘅願望。皆因岑智明由細到大都住喺西營盤，連返學都喺屋企附近，因此媽媽都要佢返屋企食飯。岑智明大呻好慘，話大學時好多應該要享受嘅生活，當時都享受唔到喎。
由出世到讀大學都喺西區
岑智明尋日朝早出席一個電台節目時就話自己係一個「西環人」，喺西營盤贊育醫院出世，自細就住西營盤水街，讀書就喺屋企對面街嘅聖保羅書院，到升入香港大學，都只係行上一條街就到，佢形容自己係「三步不出西營盤」。
佢又話，因為自己係獨仔，爸爸做飲食業，工作忙碌，媽媽就對佢照顧到體貼入微，仲一定要佢返屋企食飯，所以就算佢升咗大學都冇得同同學、朋友出街食飯，亦冇得住宿舍。同學平時話去邊度食碟頭飯同點心，又話去邊度飲茶，佢都係得個「聽」字，全部冇佢份，真係慘豬豬喇！不過，佢依家喺天文台返工，總算可以衝出西營盤喇！