中環出更：利敏貞穿鳳袍 網民當P圖
政府前日開記招，公布會就《廣播條例》同《電訊條例》第一階段檢討展開為期三個月公眾諮詢，殊不知新聞重點卻被轉移到商務及經濟發展局常任秘書長（通訊及創意產業）利敏貞身上！皆因利敏貞身穿「鳳袍」，惹嚟網民瘋狂分享，反問係咪返咗古代，又話以為係畀人P圖，甚或新年流流玩Cosplay，真係難為坐隔籬嘅商務及經濟發展局局長邱騰華唧都唔笑，認認真真公布諮詢內容嘞！
似滿清王后朝袍披領
利敏貞前日着一件棗紅色嘅長身上衣，以中式繡花為主，配搭墨綠色嘅衣領同鈕扣，最特別就係上衣有雙層衫領，睇落就好似滿清王后或王太后嘅朝袍披領一樣，盡展巾幗英姿。而呢款設計其實係方便古人喺冬季騎射狩獵，披領用嚟保護頭頸嘅。
唔少網民都喺社交網站分享利敏貞呢輯相片，仲戲謔好似滿清官服。查實利敏貞不時着好有特色嘅衫，每每都成為事件嘅焦點，有網民仲乘機幫佢搜羅相片收成相集，公諸同好！
卓妮