中環出更：憑創意奪佳績 逾百企業獲D嘜認證
喺香港「顧客至上」係好多行業嘅態度同宗旨，但香港設計委員會話今時今日「平靚正」已經唔夠，想要好嘅產品或服務仲需要設計思維，所以就搞咗個「香港D嘜認證計劃」，表揚善用設計同創意而取得佳績嘅企業，香港設計委員會主席嚴志明話個計劃已經嚟到第三年，逾百間企業拎到D嘜認證！
因為呢個獎項主要講求創意，所以創意香港總監曾昭學同香港工業總會總裁何健華都在場。問到點樣先可以拎到D嘜認證？嚴志明就話會有幾個準則，例如間企業有冇設計師或者團隊、點樣運用佢哋嘅設計去改良產品或者服務、有冇推動設計文化、投放咗幾多資源喺設計思維上等等，只要以上幾點都符合佢哋嘅要求，就可以拎到D嘜認證，而且佢哋冇時限冇限額，無論咩時候做到都可以拎到認證。
膠囊酒店重視打工仔睡眠
今年其中一個獲頒D嘜認證嘅就係喺本港開設咗首間膠囊酒店空間嘅公司，共同創辦人葛立忻同六月川話因為香港人成日都唔夠瞓，一來係因為工時長，二來花咗好多時間喺交通上，所以佢哋嘅膠囊酒店選址上環，希望可以為一啲住得遠，但又要喺市區返工嘅人提供多個選擇，佢哋仲話唔一定要過夜，日頭想Take a nap都可以租一兩個鐘嚟瞓覺，希望香港人可以重新重視番睡眠呢樣基本生活需要。
設計愛寵飾物開拓新市場
另一間公司就係憑住「寵飾」拎到認證，呢間公司嘅董事總經理楊靜、董事長朱容基兩公婆拍住上，推出咗「寵愛系列」，設計咗好多寵物專用嘅飾物，同時亦都有人用嘅「狗仔飾物」，成功開拓咗一個新市場。楊靜話起初係因為自己有養狗，想幫佢哋扮靚，而諗到呢個概念，之後請咗一班九十後嘅設計師幫手設計，話保證啲飾物又新潮又靚喎。
卓妮