中環出更：細女中流感 張國鈞打地鋪照顧
流感大爆發，學童感染情況尤其嚴重，雖然政府急急宣布停課，但立法會議員張國鈞（Horace），其細女就喺停課前中咗招，嚇到佢立即將細女同大女隔離，將細女搬到兩公婆睡房方便照顧，搞到佢要瞓地下，好狼狽。身兼行政會議成員嘅Horace唔評論政府停課決定嘅時機係咪合適，但就認同今次流感非同小可，所以細女中招後，唔畀兩姊妹瞓同一間房，以斬斷感染鏈。
將書墊地 隔絕寒氣
雖然兩姊妹分房瞓嘅計劃成功，大女力保不失保持健康，但Horace就成為犧牲品，皆因為咗方便照顧細女，佢要讓出床位，晚晚打地鋪。近期天氣持續寒冷，夜晚市區都係得十零度，佢話瞓咗一晚地下已經頂唔順，要將啲書鋪喺地板上，隔絕「寒氣」，再用睡袋保暖，好似去咗露營咁。佢又慶幸平日有健身，喺流感高峰期頂得住無中招，又話等兩個囡囡大啲，亦會叫佢哋多做運動，強身健體。
卓妮