政情：殺無赦譴責動議 何君堯缺席好騰雞

拍片自認「有啲忐忑不安」

何君堯喺短片中話，相信喺本周三立法會就政府提出嘅一地兩檢無約束力動議投票後，就會輪到譴責動議，而佢亦已逐一向建制派嘅議員打招呼，「希望同事保住我，唔使畀人插得咁應」，又話期望「大步檻過」。佢又承認自己唔能夠親自回應指控，係有遺憾同「有啲忐忑不安」，指議案如果喺分組點票時被否決，就會「安心啲」；假如要成立調查委員會，佢都對自己有信心，但唔想有任何閃失。

其實喺毛孟靜擬提譴責動議時，何君堯已去信要求對方唔好浪費時間，撤回動議，而佢亦唔係第一次向建制派伸手求助，早前得悉建制派副班長陳克勤會提出反對毛孟靜嘅動議，佢即刻逐個建制議員發短訊，呼籲佢哋緊守立法會內，咁其他建制派就會齊齊加入反對行列。

鬧爆泛民 再撩林卓廷嗌交

自爆搵建制派幫手後，佢又不忘鬧班泛民，話建制派提嘅《議事規則》修訂好有理據，絕對唔係趁病攞命，又話泛民喺上一屆已經好離譜，今屆一開波就搞個宣誓，根本就係冇規矩，加埋成日拉布喺度「豬噏」廢話，浪費時間，強調修訂《議事規則》只係修補番個一塌糊塗嘅世界。

跟住又辣埋同樣出席英國議會研討會嘅民主黨林卓廷，早幾日已出發並向英國執法部門舉報前特首梁振英涉嫌收取澳洲公司UGL共五千萬元事件。何批評林本身係立法會UGL調查委員會成員，反問「投乜嘢訴？」又話今次旅程目的係同英國當地議會人員交流議會操作，批評林搞搞震，仲話「遲啲先炮製佢」。身在英國嘅林亦拍片回應，話係因利乘便先嚟英國投訴，仲叫何身為專業律師，講嘢斯文啲，唔好下下殺殺殺，直言「梁振英我都唔怕，何君堯我又點會怕？」

鬧完泛民，又撩交嗌，仲變咗隔空罵戰，但講到最尾，佢又話自己「Keep my fingers crossed（希望所願嘅事情順利）」，再次呼籲建制派議員「保住我」。可見佢幾咁騰雞。