中環出更：疑用公帑宣傳 峯鴿甩漏惹投訴
政府推動多年嘅「離島遊計劃」，資助唔同嘅非牟利團體喺離島搞活動，推動地區經濟。最近民主黨（白鴿黨）許智峯（峯鴿）就同兩個社區幹事，搞南丫島半天遊，費用全免，份海報仲寫到明「是次活動由運輸署『離島遊計劃』支持，故此毋須支付船費，但必須依時上下船」。而呢個計劃其實係唔畀用議員名義搞，有人向運輸署投訴，懷疑峯鴿挪用公帑做宣傳，搞到活動海報都要即時撤回！
辯稱漏寫申請團體名
本身都係中西區區議員嘅峯鴿，做咗立法會議員之後，不時同班黨友搞吓社區活動，做吓宣傳。今次就同兩名黨友聯名出海報搞活動，一個唔留神就搞出個大頭佛，問番峯鴿發生乜嘢事，佢就話自己同好多人搞活動、出通告，都唔係好記得邊單。後尾峯鴿去追問番同事，先知「應該係海報上遺漏咗（申請團體名稱）」。睇怕下次有活動，峯鴿都要跟多眼睇吓，唔係班同事又有甩漏就唔好喇！
另外，睇番運輸署向投訴人嘅回覆，運輸署就話根據該署紀錄，無接獲許智峯辦事處名義提出嘅申請，但喺今年七月二十五日就收到一個慈善團體申請，喺審核完資料已經批出，而接獲投訴後，就派職員同相關團體解釋計劃申請資格，喺今個月三日去巡視時，已經發現有關海報已經移除。
卓妮