政情：麥美娟識泰拳 挑機馬逢國？
泰拳令人熱血沸騰，拳手喺擂台上埋身肉搏，務求以快、狠、準的招式擊倒對方，刺激性教人着迷。但唔講唔知，原來平時斯斯文文嘅工聯會麥美娟（Alice）都有學泰拳，仲係拳拳到肉嗰隻，一啲都唔嘢小o架！佢仲話可以考慮吓轉戰體育界，挑戰吓體育、演藝、文化及出版界議員馬逢國咁話喎。
Alice喺Facebook上載一段短片，同師傅兼藝人黃澤鋒一齊講泰拳。黃澤鋒叫Alice做「娟妹」，話兩個人喺一個活動度認識，仲話娟妹以前比較「健碩」，依家就瘦好多喇，真係好佩服娟妹可以咁有決心。黃澤鋒仲話成日喺電視度見到娟妹，簡直覺得呢個人係唔使瞓o架，可能第時代表泰拳界嘅議員就係娟妹。
仲戒咗消夜 唔再胃痛
Alice就話自己當初同一班朋友一齊學拳，最初只係覺得型同埋鍾意速度，最討厭係慢吞吞，完全冇諗減肥，反而仲因為學拳戒咗消夜，身體好咗，胃痛都冇埋。佢仲笑住話，最諗唔到係「自己咁嘅年紀都仲可以學拳」，而且可以諗諗進軍體育界添！