政情：公民講場：陳肇始驗不停 大閘蟹等到瘦

今年首批獲得內地批文嘅大閘蟹已經抵港，而且已經獲食安中心確認內地發出嘅衞生證明，本來前日就可以開售，但係食物環境衞生署突然要商戶等埋食安中心嘅檢驗報告，確認冇問題先可以再出售。食物及衞生局局長陳肇始尋日就聲稱，食安中心已經加強人手，加快驗蟹時間。由原本需時一個月縮至半個月，即係市民最快都要半個月後先至有蟹食。啲大閘蟹坐半個月蟹監，分分鐘餓到蟹膏都減少。咁搞法，啲食客望穿秋水最後可能都只係食到啲瘦蜢蜢大閘蟹喇。