港區人大代表換屆選舉將於今年底舉行，各個建制派政團、社團、富二代、紅二代等，早已在明在暗爭位爭崩頭。此時政圈突然傳出中聯辦將一改自七十年代文革以來嘅做法，放棄直接派人參選港區人大，究竟今次係咩玩法？
現有三十六個港區人大議席當中，向來有最少有一個席位係預留畀中聯辦（前稱新華社香港分社）高層參選，而且每次都會自動或高票當選，前新華社社長許家屯、周南及中聯辦前主任姜思柱都做過，近年則先後轉由喺香港土生土長嘅中聯辦前主任助理王如登、以及擁有香港居民身份嘅中聯辦前社會工作部部長張鐵夫出選。
有資深建制派人士透露，早前問過年屆六十五歲、現已從中聯辦退休嘅張鐵夫年底會否繼續參選，對方坦言應該唔會再選喇，但就暫未覓得合適嘅接班人。不過，亦有多位資深港區人大都話，冇聽過中聯辦會打破傳統唔派人參選。
有港區人大就話，由於近年規定只有香港居民先可以參選港區人大，內地又收緊中央駐港人員留港年期及取得香港居民身份嘅限制，可能令中聯辦較難搵到接班人選。
但估計即使中聯辦真係放棄直接派人參選，空出嘅港區人大議席亦會轉畀其他中央駐港單位或中資機構，唔會開放予本地建制派或商界人士競爭。如果係咁，對有意參選人士嚟講都係冇着數嘅。