東網直播森巴射手過招 陽光元朗夜戰R&F富力
陽光元朗今季因颱風延期的首輪港超聯賽事，會於今晚8時進行補賽，由「橙衫軍」於元朗大球場主場迎戰R&F富力。今場焦點之一，相信是兩大巴西射手艾華頓及般連奴鬥射術拗手瓜，究竟元朗可延續贏波氣勢，還是富力能夠打開勝利之門？球迷們記得留意東網on.cc直播！
（東網on.cc周六晚8時直播）
上周在高級組銀牌賽8強賽事，戰至加時階段以4比2擊敗和富大埔的陽光元朗，恰巧跟R&F富力於菁英盃的首輪分組賽輪空，令兩隊原定於8月尾上演的聯賽得以安排補賽。元朗主教練曾昭達表示，勝仗令球隊士氣大振：「球員好落力，我非常欣賞佢哋喺場上嘅拚搏精神。我承認我哋係幸運嘅一方，始終雙方埋門都多，只係我哋把握得比人哋好，不過整體而言，球員發揮得幾好。贏波對球隊上下嘅信心都有所提升，球隊嘅目標都係向盃賽進發，尤其係之前有幾場都係喺優勢之下輸波，所以呢場波算係一支強心針。」
馬里科：堅持風格求開齋
「達Sir」坦言對富力的認知不多，惟有向凍結對手主力着手：「對手實力強，其中如般連奴亦係個人能力強嘅球員，希望可以盡量喺部署上做多啲，因為始終富力近3個星期都冇喺港超亮相，所以佢哋仍然存在好多未知數。」陽光元朗的艾華頓一直被球會及球迷寄予厚望，這位開季至今腳風欠順的森巴前鋒，料會趁對手久疏戰陣爭取「士哥」。
R&F富力今季分別因颱風及主場問題，有多達3場聯賽均要延期，球隊上場出戰本地賽事已經是1個多月前於高級組銀牌賽首圈的賽事，最終以1比2不敵理文出局。主教練馬里科透露，他在休戰期間曾為球隊安排友賽，讓球員保持比賽狀態，同時亦強調球隊會保持自己的足球風格：「我哋會堅持自己嘅足球風格，並為首場勝利而戰。球隊喺近3星期合共踢咗3場友賽並且贏波，球員喺操練期間亦表現得好好，佢哋所需要做嘅，就係要對自己更有信心。」