政情：修改《議事規則》有暗湧 建制派十萬火急
立法會隨住去年青年新政梁頌恆、游蕙禎所觸發宣誓風波，兩人連同社民連梁國雄、香港眾志羅冠聰、劉小麗、姚松炎一同被褫奪立法會議員資格（DQ），現時立法會共有六個議席空缺，民主派剩番嘅大部分屬於傳統溫和泛民。建制派為杜絕民主派拉布，就想把握機會修改《議事規則》，更由議員陳克勤同張宇人代表出擊，去信立法會議事規則委員會要求修改。不過，坊間一直以為修改《議事規則》嘅死線係明年三月，但時間其實緊迫得多，建制派呢個大計可謂充滿暗湧！
根據《基本法》，任何由議員提出嘅法案、議案同修正案都需要經分組點票，即在席功能界別同地區直選議員各半贊成先可以通過。惟隨住六人被DQ，建制派同民主派勢力分布有所改變，建制派首次喺地區直選嘅議席較泛民多，加上本身喺功能界別有壓倒性優勢，所以理論上夠票修改《議事規則》。
然而，建制派要採取行動就要夠快，要趕喺明年三月十一日立法會新界東、九龍西、港島區，以及建築、測量、都市規劃及園境界四個議席補選前進行，事關三場地區直選嘅補選各填補一個議席，喺單議席單票制下，好大機會由民主派奪得，屆時建制派同民主派喺地區直選議席將為十六對十七，建制派就難以再改《議事規則》喇。
不過，三月補選前完成相關工作只係名義上嘅死線，有建制派議員就坦言時間其實非常緊迫，預計真正打仗會喺明年一月。因為立法會喺十二月尾至明年一月初將放三個星期聖誕及新年假，二月又遇上農曆新年及政府發表財政預算案，三月首兩星期就正值內地兩會召開，立法會慣常都唔開會。
真正死線喺明年2月7日
計計埋埋，補選前最後一次會議就係明年二月七日舉行，所以如果嗰陣都未通過修改《議事規則》，建制派嘅大計就可以宣告自然死亡，難怪有建制派大呻時間極之緊迫。加上泛民已明言會拉布拉到補選，早前仲打尖提出有關《議事規則》嘅修訂，企圖截建制派胡，所以建制派要趕及修改《議事規則》真係危危乎！
由建制派人數佔多嘅議規會亦已開快車加緊處理，初步訂咗下月初召開兩日共八個小時會議，足證建制派都想快刀斬亂麻，盡快將建議提交大會審議。議規會主席謝偉俊亦承認處理修改《議事規則》嘅時間緊迫，但強調會盡做，睇嚟建制派都知時日無多喇。