中環出更：工業界女將趨增 陳婉珊：力量漸強
香港青年工業家協會早前換屆，由女工業家陳婉珊（Clara）接張傑棒做會長。儘管由女士擔任會長職務並非首次，但今次執委會內嘅女性成員多達九位，屬歷屆最高。就呢個現象，Clara話係反映一眾姊妹喺工業界嘅力量日漸增強。
執委吳慧君好同意會長嘅講法，從事紡織業嘅佢話女性工業家只會愈嚟愈多，因為男女機會平等係世界嘅大趨勢。就算保守如沙特阿拉伯，近日亦容許女性考取駕駛執照。雖然理論上，兩性嘅工作能力不應分上下，但吳慧君覺得男女擅長嘅嘢始終有別，如男士精於數學物理同科研；女士則比較細心，擅於宣傳溝通，市場銷售同品牌營造。無論男士研發嘅產品點樣優秀，都係需女士嘅參與至可以增強市場競爭力。
莫慕潔解難靠嗲功
綽號「鐘錶之花」嘅莫慕潔今屆都係執委，本業係生產手錶指針，佢之所以投身呢門精密工業，係因為外公將盤生意交畀佢媽咪，佢長大後就同媽咪一齊打拚。儘管公司內仍有人抱持成見，輕視投身工業嘅女性並加以為難，但佢都係覺得女性嘅柔和力量，對業務發展係有正面意義，例如女士唔似男士咁要面子，有時發下嗲功不恥下問，好多難題都會迎刃而解。總之有時唔好當自己係女人，但適時又要發揮女性嘅特質，就係佢喺工業界立足嘅心得。
至於新加入執委會嘅女企業家黃宓芝就話自己從事嘅行業頗適合女性發揮，因為佢嘅業務係生產廚具與家庭用品，主顧多數係家庭主婦。因此以女性角度來設計產品，更能夠貼近用家嘅需要。佢話今日工廠嘅環境已大有改善，令更多女性願意投身工業界。
卓妮