中環出更：張雲正忘年戀 終修成正果
今年五十五歲嘅公務員事務局前局長張雲正（Clement）譜出一段忘年戀。尋日佢正式脫離鑽石王老五行列，與「八十後」新聞主任Florence結婚，並喺尖沙咀半島酒店舉行結婚典禮，邀請親友到場。Clement大讚太太靚，仲話太太「多過一百分」，認真甜蜜呀！
喺昨晚嘅婚宴上，張雲正身穿黑色禮服，太太就穿上粉紅色嘅晚裝，而喺婚宴現場放咗多張婚紗照，太太身穿超低胸嘅婚紗，老公張雲正搭住太太肩膊時，左手剛好遮咗少少低胸嘅位置，唔知係咪怕太太蝕底呢？而另一張婚紗照就見到張雲正咬住一支花，盡顯佢俏皮嘅一面。
新娘最欣賞張睇文件用心
新郎同新娘子二人都對對方讚不絕口，Florence話最欣賞老公Clement睇文件好用心，真係好想服務市民，尋晚除咗想多謝老公，仲一定要多謝奶奶教得老公咁好。
Clement都大讚太太對佢嘅媽媽真係好好，而佢哋兩個嘅價值觀好接近，好鍾意幫人，兩個人都係比較簡單，一樣唔鍾意名牌，去旅行都唔鍾意shopping嘅，飲杯咖啡就滿足嘞！至於幾時會生小朋友呢？Clement笑指「唔係你想生就一定有」，隨遇而安啦！兩個人咁恩愛，相信新婚生活一定非常幸福美滿喇！
卓妮