政情：黃台仰 林淳軒又要威又怕監

黃認過往行動天真 但冇道歉

黃台仰尋日同香港眾志常委林淳軒出席座談會，佢指本民前以往天真地發起行動，包括光復行動，但佢已經不斷從市民嘅意見對事件作出反思，希望令自己進步。佢仲話過往抗爭者因面對打壓，容易受情緒影響決定。然而，佢話唔同嘅情緒係必要，包括仇恨、失落、憤怒等，因為可以將呢啲情緒轉化作動力，而唔係畀情緒主導喎。

講到近期有唔少抗爭者被判入獄，佢就話每次睇到相關報道都會感到低落，而自己更係旺角暴亂後有機會面對較長嘅監禁刑罰，直認起初會擔心同驚，更可能出現咗些少抑鬱症，變得唔想見人，但佢其後發現抑鬱唔會帶來正面效果，又唔想浪費自己同其他人嘅付出，所以就轉化成動力，例如去進修、宣揚理念等。

雖然黃台仰認衰，但仍然有人要求佢就企高台叫人衝擊同攻擊和理非嘅行為道歉，更有人斥責佢作為領袖鼓吹其他人掟磗放火令其他人坐監嘅行徑，然而黃台仰就話道歉好容易同簡單，但質疑自己道歉無助改變民主運動，希望大家吸取教訓望向將來，最終並未作出道歉。

被控非法集結 林堅持唔認錯

同場仲有喺舊年反釋法遊行中被控非法集結嘅林淳軒，佢就自爆對有機會入獄感到極度驚恐同極度唔想，而佔中搞手陳健民同戴耀廷等人以唔開冷氣、唔着長袖衫只係為入獄作心理準備，但入獄來臨嗰陣無法作準備，不論練習幾多次都係比想像艱難，所以佢自己對即將入獄感到好難受咁話。不過，佢就相信入獄可以有啟蒙作用，亦可以作為威權統治來臨嘅警號。

林淳軒雖然大嘆唔想入獄，但佢就話無悔參加社運，反而對此感到好驕傲，因為所做嘅事好有意義，反指若當日無參加反對國民教育同佔領行動先會令佢後悔喎！睇嚟黃台仰同林淳軒都有共同點，就係堅持自己行為無錯囉，究竟有冇錯就要睇吓法庭嘅裁決嘞！