中環出更：泛民倡「內地一地兩檢」 戴耀廷加把口
由多個民主派團體成立「一地兩檢關注組」，抄橋違法佔領行動舉行商討日（D-Day）嘅討論模式，尋晚喺香港大學舉行商討日，投票選出「內地一地兩檢」方案為替代方案，即最少一個內地車站設立「一地兩檢」口岸，辦理港方同內地出入境手續，最令人意想不到嘅係，四年前提出醞釀佔中嘅戴耀廷，有份參加今次關注組商討日，仲指手畫腳，莫非佢忘記咗自己過去「搞乜衰乜」，依家仲發夢做民主派「理論大師」？
關注組今次報稱係經過成員兩輪投票，最終「內地一地兩檢」獲得半數在席成員支持。關注組聲稱，據政府現時高鐵載客估算，有八成乘客屬於短途乘客，目的地係廣州南站前，包括福田、深圳北站，由此推斷，如果喺內地短途車站設置一地兩檢關卡，「對絕大部分乘客不會造成不便」。至於西九空置口岸樓層，關注組建議將其出租作商業用途。
紙上談兵 欠實際方案
不過，關注組嘅新方案甫曝光，就有多個懸而未決嘅問題要解決，第一，點樣爭取港府採納呢個建議；第二，「內地一地兩檢」方案造價涉及幾多公帑；第三，由於內地大部分車站已開通，包括福田口岸冇預留空間進行一地兩檢，關注組呢個建議係想將福田口岸夷為平地，重新規劃，抑或想「邊通車，邊施工」。凡此種種，都需要關注組有清晰答案，停留喺紙上談兵階段，相信又係無米粥居多。
卓妮